喺香港要搵台式小食或者茶飲店真係話都無咁易，但如果話食台灣小菜，又唔係真係度度搵到。尖沙咀商場最近新開咗間台式文青小菜館忠孝東路，除咗台式飲品同小食外，仲有唔同嘅小菜食，傳統同摩登嘅都有添！

負責人話覺得香港較少有呢類型嘅台式餐廳，所以希望可以將台灣餸菜帶嚟香港。餐廳裝修以清新文青風為主，餐廳特意邀請台灣人氣文青風插畫家「欣蒂小姐（Miss Cyndi）」喺餐廳牆身繪畫台灣人文風光。

台灣大甲香芋雞($108)

大廚先將雞走油再焗一焗，之後連埋其他配料快炒連瓦煲上，好夠鑊氣！大甲芋頭食落好粉，而且比起其他芋頭香氣更重。雞係三黃雞，香啲同雞味重，仲要啖啖肉。

慢煮‧香草小牛排骨($298)

牛小排先慢煮48小時再醃，之後拎去烤焗，熟成程度啱啱好！食嘅時候可以自己選擇配埋孜然粉、五香粉或椒鹽食，各有風味！

三杯蛤蜊($128)、花雕醉雞($78)

蛤蜊好新鮮，食落無沙，而且用三杯汁炒夠哂惹味。花雕醉雞都係用三黃雞，滑得嚟一啲都唔肥。

滷水拼盤($188)

滷水拼盤有牛展、牛筋、鴨舌、豆腐同糖心蛋，全部都入哂味，牛筋炆得夠腍之餘仲有咬口，呢碟野送酒一流！

忠孝牛肉湯麵($73)、忠孝魯肉飯($65)

牛肉麵同魯肉飯可以話係台灣代表食物，忠孝東路呢度就特別啲，牛肉麵就有黑湯同白湯揀，黑湯係熬咗8小時嘅牛骨湯，白湯就係用雞骨豬骨熬成，啱哂唔同口味嘅人。麵底用咗扯麵，食落會較煙韌。魯肉飯加上酸菜，味道同口感都豐富咗，負責人話正宗嘅魯肉飯食到最後，碗底見到嘅唔係汁，而係微微嘅油光。

忠孝生果茶($38)、黑魔($33)

餐廳好貼心，生果茶嘅冰係用咗水果冰，希望客人飲第一啖同最後一啖嘅味道都係一樣，唔會因為溶冰而淡咗。黑魔即係黑糖牛乳奶蓋，加埋奶蓋嘅平時較少見，而且飲落唔會過甜！11月25-29日期間仲會每日免費送出100杯！

忠孝東路

地址: 尖沙咀彌敦道63號國際廣場3樓306號舖

文、相、片：Yanica